Ереванда депозиттерге кепілдік беруді үйлестіру саласындағы ЕАЭО сараптама тобының отырысы өтті

Ереванда депозиттерге кепілдік беруді үйлестіру саласындағы ЕАЭО сараптама тобының отырысы өтті

Іс-шараға Қазақстанның депозиттерге кепілдік беру қоры төрағасының орынбасары Алмаз Құдайбергенов қатысты.

6-7 қазан аралығында Еуразиялық экономикалық одақтың сарапшылық тобының кезекті отырысы өтті, ол Еуразиялық экономикалық комиссияның қаржы нарықтары жөніндегі консультативтік комитетінің жанындағы ЕАЭО аумағындағы банк салымдарына кепілдік беру, кредиттік ұйымдарды тарату, қаржылық сауықтыру және банкроттығы саласындағы заңнаманы үйлестіруге арналды.

Гибридтік форматтағы жиналысқа Армения, Беларусь, Қазақстан, Ресей және Қырғызстанның депозиттерді сақтандырушы, қаржылық реттеуші, ұлттық (орталық) банктерінің өкілдері қатысты. Кездесуді Арменияның депозиттерге кепілдік беру қоры мен Еуразиялық экономикалық комиссия ұйымдастырды.

Кездесу барысында қатысушылар кредиторлардың талаптарын қанағаттандыру басымдығы саласындағы тәсілдер мен әдістемелерді, депозиттерге кепілдік беретін ұйымдардың қызметкерлерін құқықтық қорғау мәселелерін, сондай-ақ ЕАЭО аумағында депозиттерге кепілдік беру қорларының қаражатын инвестициялау тәртібін талқылады.

Өз кезегінде ҚДКБҚ Төрағасының орынбасары Алмаз Құдайбергенов ҚДКБҚ активтерін басқарудағы тәжірибесімен, сондай-ақ кредиторлардың талаптарын қанағаттандыру басымдығымен бөлісті.

«ҚДКБҚ басымдығы салымшыларды қорғаудың тең жағдайлары болып табылады. Олардың қорғалуын қамтамасыз ету де ЕАЭО елдерінің заңнамасын үйлестіру аясындағы негізгі міндеттердің бірі болып табылады», – деді Алмаз Құдайбергенов.

Екі күндік кездесулердің қорытындысы бойынша қатысушылар ЕАЭО-ға мүше мемлекеттердің депозиттерге кепілдік беру саласындағы заңнамасын үйлестіру бойынша одан әрі ынтымақтастықты жалғастыруға келісті. Тараптар халықаралық қағидаттарға, стандарттарға және озық халықаралық тәжірибеге негізделген банк салымдарына кепілдік беру жүйесін дамытудағы күш-жігерді үйлестіруге ниетті.